रास्वपा र विवेकशील साझाबीच औपचारिक रूपमा एकता

विवेकशीलको अवसान, रास्वपाको विस्तार

मेयरसाप डेस्क

काठमाडौं । वैकल्पिक राजनीतिको क्षेत्रमा महत्त्वपूर्ण कदम चाल्दै राष्ट्रिय स्वतन्त्र पार्टी (रास्वपा) र विवेकशील साझा पार्टीबीच आज काठमाडौंमा औपचारिक एकता घोषणा भएको छ ।

रास्वपाका तर्फबाट कार्यवाहक सभापति डोलप्रसाद अर्याल र डा. स्वर्णिम वाग्ले तथा विवेकशील साझाकी अध्यक्ष समीक्षा बाँस्कोटा र उपाध्यक्ष प्रकाशचन्द्र परियारले पाँच बुँदे सहमतिमा हस्ताक्षर गरेका छन् ।

एकीकरणपश्चात् दलको नाम ‘राष्ट्रिय स्वतन्त्र पार्टी’ र चुनाव चिन्ह ‘घण्टी’ साविककै रहनेछ । सहमतिअनुसार, स्व. उज्ज्वल थापा र ‘विवेकशील अभियान’को योगदानलाई दस्ताबेजमार्फत मान्यता दिइनेछ ।

विवेकशील साझाबाट आउने नेता तथा सदस्यहरूलाई योग्यता र समावेशिताको सिद्धान्तका आधारमा पार्टीका केन्द्रीय, प्रादेशिक र स्थानीय संरचनाहरूमा समुचित समायोजन गरिनेछ ।

एकीकरणले लोकतान्त्रिक सुशासन र समुन्नतिका मुद्दाहरूलाई अघि बढाउन अन्य परिवर्तनकारी वैकल्पिक शक्तिहरूलाई पनि ‘घण्टी’मा गोलबद्ध हुन आह्वान गरेको छ ।