औषधी ऐनको प्रावधानविरुद्ध बाजुरामा विरोध प्रदर्शन

गोविन्द तिमिल्सेना

बाजुरा । औषधी ऐन, २०३५ को दफा ११ मा राखिएको अव्यावहारिक प्रावधान खारेज गर्नुपर्ने माग राख्दै बाजुराका औषधी व्यवसायीहरूले विरोध प्रदर्शन गरेका छन् ।

केन्द्रीय सर्कुलरअनुसार जिल्ला अस्पताल लाइनमा भेला भएका मेडिकल व्यवसायीहरूले आइतबार हातमा कालोपट्टी बाँधेर र प्लेकार्डसहित धर्ना तथा विरोधका कार्यक्रम गरेका हुन् ।

व्यवसायीहरूले औषधी ऐन २०३५ को दफा ११ को उपदफा ५ अव्यावहारिक रहेको भन्दै तत्काल खारेज गर्न माग गरेका छन् ।

नवीकरणको म्याद गुज्रिएको भोलिपल्टैदेखि शतप्रतिशत जरिवाना लाग्ने र ३१औँ दिनमा इजाजतपत्र स्वतः रद्द हुने जस्ता प्रावधानहरू तत्काल हटाउनुपर्ने उनीहरूको माग छ ।

मेडिकल व्यवसायी तथा आरसी मेडिकल हलका सञ्चालक रामचन्द्र यादवले राज्यले सहज नीति नियमन गर्नुभन्दा पनि व्यवसायीलाई त्रसित बनाउने काम गरेको आरोप लगाए ।

व्यवसायीहरूले आफ्ना जायज मागहरू पूरा नभएमा सङ्घर्षका कार्यक्रम जारी राख्ने चेतावनी दिएका छन् ।