बस्तीमा पसेको भाले गैँडालाई 'डार्ट' गरी स्थानान्तरण

मेयरसाप डेस्क

चितवन । चितवन राष्ट्रिय निकुञ्ज क्षेत्रबाट बस्तीमा पसेर स्थानीय बासिन्दालाई दुःख दिँदै आएको एउटा भाले गैँडालाई निकुञ्जले आन्तरिक रूपमा स्थानान्तरण गरेको छ ।

भरतपुर महानगरपालिका–२३, घैलाघारी क्षेत्रमा बस्दै आएको अन्दाजी २५ वर्षको उक्त गैँडालाई सौराहा सेक्टरको कुमरोज सामुदायिक वन क्षेत्रमा सारिएको हो ।

निकुञ्जका सूचना अधिकारी अविनाश थापा मगरका अनुसार सो गैँडा बस्तीमा पसेर बालीनाली नोक्सानी गर्ने र बाहिर मात्र बस्न खोज्ने भएकाले नागरिकको सुरक्षाका लागि स्थानान्तरण गर्नुपरेको हो ।

समुदायमा पसेर मानवीय क्षति गर्न सक्ने जोखिम बढेपछि यो कदम चालिएको हो । गैँडालाई ’डार्ट’ (निश्चेत पार्ने सुई) प्रयोग गरेर स्थानान्तरण गरिएको थियो ।

निकुञ्जले विगतका वर्षहरूमा पनि पश्चिम क्षेत्रमा गैँडाको सङ्ख्या बढेपछि बस्ती पसेर त्रास फैलाउने गैँडाहरूलाई आन्तरिक रूपमा व्यवस्थापन गर्न स्थानान्तरण गर्दै आएको जनाएको छ ।