काठमाडौँ, कात्तिक २७: देशभरका स्थानीय तहसँग संघीय सरकारले आर्थिक सुधारको खाका  मागेकाे छ । 

उच्चस्तरीय आर्थिक सुधार सुझाव आयोगको पत्रानुसार संघीय मामिला तथा सामान्य प्रशासन मन्त्रालयले आर्थिक सुधारका सम्बन्धमा स्थानीय सरकारसँग राय  सुझावसहितकाे लिखित लिखित सुधारकाे खाका माग गरेकाे हाे । मन्त्रालयले आउँदो मंसिर १५ गतेभित्र आयोगलाई त्यस्ताे खाका उपलब्ध गराउन देशभरका सबै स्थानीय तहलाई पत्राचार गरेकाे छ । 

विद्यमान आर्थिक समस्या समाधान गर्दै समतामूलक दिगो उच्च आर्थिक बृद्धि, रोजगारी सिर्जना, अर्थतन्त्रको संरचनात्मक परिवर्तन गरी औद्योगिक/उत्पादनशील अर्थतन्त्रको निर्माण, गरिबी निवारण एवं समृद्ध नेपाल निर्माण गर्न आर्थिक सुधारको खाका ६ महिनाभित्र पेस गर्ने गरी काम भइरहेको आयोगले मन्त्रालयलाई लेखेको पत्रमा उल्लेख छ । 

आयोगको पत्रअनुसार मन्त्रालयले गएकाे आइतबार देशभरका सबै स्थानीय तहलाई लेखेको पत्रमा भनिएको छ, ‘उच्चस्तरीय आर्थिक सुधार सुझाव आयोगको च.नं. २ मिति २०८१ ।०७।१२ को राय सुझावसम्बन्धी पत्र आवश्यक जानकारी तथा कार्यार्थ यसैसाथ संलग्न गरी पठाईएको व्यहोरा आदेशानुसार अनुरोध छ ।’