काठमाडौँ, कात्तिक २७: बजेट पास गर्न नसक्दा सप्तरीको हनुमाननगर कंकालिनी नगरपालिकाको मुख्य द्वारमा तालाबन्दी गरिएको छ । नगरपालिकाका कर्मचारी तथा सामुदायिक विद्यालयका शिक्षकले तलब नपाएको भन्दै तालबन्दी गरेका हुन् ।

गत साउनदेखिको पाउनुपर्ने तलब नपाएपछि बाध्य भएर ताला लगाइएको आन्दोलन परिचालन समितिका संयोजक अशोककुमार यादवले बताए । मेयर र उपमेयरलगायत जनप्रतिनिधिहरुलाई बजेट पास गरेर तलब उपलब्ध गराइदिन पटक पटक मौखिक र लिखित रुपमा जानकारी गराउँदा पनि तलब नपाएपछि तालाबन्दीको विकल्प नभएको यादवको भनाइ छ ।

नगरपालिकाका मेयर बीरेन्द्र माझी भने बजेट पारित नभएकोले शिक्षक र कर्मचारीलाई तलब खुवाउन नसकिएको बताउँछन् । 

कानुन अनुसार स्थानीय सरकारले आगामी आर्थिक वर्षको लागि असार १० गतेभित्रमा बजेट ल्याइसक्नुपर्छ भने असार मसान्तभित्रमा पारित गरिसक्नु पर्छ । तर, हनुमाननगर कंकालिनी नगरपालिकाले दिएको बजेट सिलिङप्रति वडाध्यक्षहरुले विमती राखेपछि बजेट निर्माण कार्य नै प्रभावित भएको छ ।

‘नगरपालिकाले ८ करोड ७० लाखको सिलिङ दिएर बजेट योजना पठाउन वडा कार्यालयहरुलाई भनिएको थियो । तर, बजेट कम भएको भन्दै वडा कार्यालयहरुले बजेट कार्यक्रम नै पठाएनन् । त्यसैकारण बजेट ल्याउन सकिएको छैन । अहिले वडा कार्यालयहरुसँग एक प्रकारको सहमति भइसकेको छ । अब बढीमा १५ दिनभित्र बजेट ल्याउने गरी पहल थालेको छु,’ मेयर माझीले भने ।

उनले सो विषयमा आन्दोलनरत शिक्षक र कर्मचारीसँग पनि कुरा गरेका छन् । यथार्थ अवस्थाबारे शिक्षक र कर्मचारीलाई जानकारी गराएको हुँदा अब ताला खुल्ने र पठनपाठन तथा नगरपालिकाको काम सौहार्दरुपमा हुने विश्वास मेयर माझीको छ ।

हनुमाननगर कंकालिनी नगरपालिकाले अझै ल्याउन सकेन बजेट