न्यौपानेको नेतृत्वमा राज्य व्यवस्था समितिको पहिलो बैठक बस्दै

मेयरसाप डेस्क

काठमाडौं । प्रतिनिधिसभा अन्तर्गतको राज्य व्यवस्था तथा सुशासन समितिको बैठक भदौ १७ गते मंगलबार बस्ने भएको छ।

समितिकी नवनिर्वाचित सभापति ईश्वरीदेवी न्यौपानेले मंगलबार दिउँसो २ बजेका लागि बैठक बोलाएकी हुन् । उनी सभापतिमा निर्वाचित भएपछिको यो पहिलो बैठक हो ।

सभापति न्यौपानेका अनुसार, बैठकको मुख्य कार्यसूचीमा समितिको हालसम्मका कामकारबाहीको समीक्षा गर्ने र निवर्तमान सभापति रामहरि खतिवडालाई धन्यवाद दिने रहेको छ ।

समितिमा हाल नेपाल प्रहरी विधेयक, सशस्त्र प्रहरी बल विधेयक, निर्माणमुखी सामग्री विधेयक र अख्तियार दुरुपयोग अनुसन्धान आयोग (तेस्रो संशोधन) विधेयक लगायतका महत्त्वपूर्ण विधेयकहरू विचाराधीन अवस्थामा छन् ।

बैठक नियमित नहुँदा समितिमा रहेका ७२ भन्दा बढी उजुरीहरूमाथि पनि छलफल हुन सकेको छैन ।