भूकम्प र आधुनिक प्रविधिको मारमा भोजपुरका ऐतिहासिक पुस्तकालय

मेयरसाप डेस्क

टक्सार । आधुनिक प्रविधिको विकास र भूकम्पका कारण भोजपुरका ऐतिहासिक पुस्तकालयहरू सङ्कटमा परेका छन् । टक्सारमा रहेको श्रीराम अमर पुस्तकालय र सिद्धेश्वरस्थित जनहित पुस्तकालय पठन संस्कृतिमा कमी आउँदा र आर्थिक अभावका कारण सञ्चालनमा समस्या आएको छ ।

राणाकालमा स्थापित श्रीराम अमर पुस्तकालय वि.सं. २००५ देखि सञ्चालनमा आएको थियो र वि.सं. २०१० मा शहीदहरूको सम्झनामा यसको नाम श्रीराम अमर सहिद पुस्तकालय राखिएको थियो ।

तर, २०७२ सालको भूकम्पले भवनमा क्षति पुर्याएपछि नियमित सञ्चालनमा समस्या भएको छ । भवनको पुनर्निर्माणका लागि बजेट अभाव हुँदा ऐतिहासिक महत्त्वको यो पुस्तकालय लोप हुने अवस्थामा पुगेको संरक्षक शेरबहादुर मोक्तानले बताए ।

पछिल्लो समय इ–लाइब्रेरी सञ्चालनका लागि दुईवटा कम्प्युटर प्राप्त भए पनि भवनको अभावले आधुनिक प्रविधिको प्रयोग गर्न सकिएको छैन । करिब ६ हजार पुस्तक रहेको यो पुस्तकालयलाई बचाउन स्थानीयहरूले पहल गरिरहेका छन् ।

त्यस्तै, वि.सं. २०१२ मा स्थापित जनहित पुस्तकालय पनि पाठकको अभावका कारण बन्द भएको शिक्षक गणेश श्रेष्ठले बताए । दुवै पुस्तकालयलाई आधुनिक रूपमा विकास गर्नुपर्ने आवश्यकता औँल्याइएको छ ।