काठमाडौँ 
असोज २४ गते,
गुल्मीमा चाडपर्व लक्षित पाँच सय ३८ पसलमा अनुगमन गरेको घरेलु तथा साना उद्योग कार्यालय गुल्मीका प्रमुख राजीव अर्यालले जानकारी दिनुभयो । पछिल्लो समयमा ग्रामीण स्तरमासमेत पुगेर अनुगमन गरेकाले पहिलो चरणमा सचेत गराइएको उहाँको भनाइ छ । 
कतिपय पसल मापदण्ड विपरीत पनि चलेको पाइएकाले त्यी पसलहरूलाई सुधारको मौका दिइएको बताउनुभयो । सुधार नभएमा अव हुने अनुगमनमा कानुन अनुसारको कारबाही गरेरै छाड्ने उहाँले चेतावनी दिनुभयो ।
जिल्ला प्रशासन कार्यालय गुल्मीका प्रशासकीय अधिकृत तारानाथ फुल्देलका अनुसार अनुगमनका क्रममा धेरै जसो पसलमा मूल्य सूची नराख्ने, दर्ता गरेका भए पनि नवीकरण नगर्ने र दर्ता भएका प्रमाणपत्रहरू देख्ने ठाउँमा नराख्ने गरेको पाइएको छ । आगामी दिनमा पसल सञ्चालकहरूलाई सचेत गराउनका लागि सचेतनाका कार्यक्रमहरू अगाडि बढाउनुपर्ने र निरन्तर अनुगमन गर्नु नै उत्तम हुने उहाँको तर्क छ । सचेत गराउँदा गराउँदै पनि अटेर गरेमा कानुन अनुसारको कारबाही गरेरै छाड्ने उहाँको दाबी छ । 
अनुगमनका क्रममा एक लाख बढीको म्याद गएका खाद्यवस्तु जफत गरिएको फुल्देलले बताउनुभयो । पसलमा म्याद गएका बिस्कुट,आटा,सूजी, कोकाकोलाजस्ता खाद्यवस्तुहरू जफत गरी नष्ट गरिएको उहाँले बताउनुभयो । आगामी दिनमा निरन्तर रूपमा बजार अनुगमन गर्ने गरी योजना बनाएको उहाँको भनाइ छ ।