काठमाडौँ 
असोज २१ गते,
कञ्चनपुरको एक वडाले दसैँ मनाउन विपन्न एवं बाढीपीडित परिवारलाई खाद्यान्न वितरण गरेको छ। दोधाराचाँदनी नगरपालिकाको ६ नम्बर वडाले दसैँ मनाउन विपन्न बाढीपीडित परिवारलाई खाद्यान्न वितरण गरेको हो ।
गत असार र भदौमा आएको बाढीबाट विस्थापित भएका वडाका स्थानीय एवं आर्थिक रुपमा विपन्न आदिवासी जनजाती दलित समुदायका परिवारलाई खाद्यान्न समाग्री वितरण गरिएको हो ।  सोमबार एक कार्यक्रमविच वडाध्यक्ष ओम बस्नेतले खाद्यान्न वितरण गरे । उनका अनुसार प्रतिपरिवार १ बोरा चामल, दाल, नुन, तेल, साबुनसहितका सामाग्री वितरण गरिएको छ ।
‘बाढीबाट पीडित र विपन्न समुदायका नागरिकलाई सहजरुपमा दसैँ मनाउनका लागि हामीले आधारभूत खाद्यान्न सामाग्री वितरण गरेका छौँ,’उनले भने,‘खाद्यान्न बिना कुनैपनि वडाबासी दशैँ मनाउनबाट बञ्चित नहोस् भन्ने हाम्रो उद्देश्य हो ।’ वडाका अढाई सय परिवारलाई खाद्यान्न वितरण गरिएको बताउँदै वडाध्यक्ष बस्नेतले छुटफुटलाई पनि वितरण गरिने बताए ।