काठमाडौँ 
असोज २२ गते,
नुवाकोटको तारकेश्वर गाउँपालिकामा ज्येष्ठ नागरिकसँग पालिका अध्यक्ष कार्यक्रम सञ्चालन गरिएको छ । सोही अवसरमा गाउँपालिका अध्यक्षसँग ज्येष्ठ नागरिकहरूले प्रत्यक्षरुपमा स्वास्थ्य,सामाजिक समस्या र समाधानका विषयमा अन्र्तक्रिया समेत गरेका हुन् । कार्यक्रम अन्तर्गत तारकेश्वरका सबै ६ वटै वडामा ज्येष्ठ नागरिकहरूले सामाजिक सुरक्षा भत्तावापतको रकम प्राप्त गरेका छन् । 
वडा वडामै जेष्ठ नागरिकहरूको स्वास्थ्य परीक्षणसमेत गरिएको छ । ज्येष्ठ नागरिकहरूले घरदैलौमै स्वास्थ्य सेवा र सामाजिक सुरक्षा भत्ता प्राप्त गरेका हुन् । तारकेश्वर गाउँपालिकाले सबै ज्येष्ठ नागरिकहरूलाई सामाजिक सुरक्षा भत्ता वितरण  सम्पन्न गरेको हो । तारकेश्वर गाउँपालिकाले दुई हजार चारसय ८२ जनालाई सामाजिक सुरक्षा भत्ता वितरण गरेको छ ।
एकहजार आठसय दुई जना वृद्धवृद्धाको स्वास्थ्य परीक्षण गरिएको छ । तारकेश्वर गाउँपालिका अध्यक्ष शिव अधिकारीले चाडपर्वलाई ध्यानमा राख्दै वृद्ध भत्ता वितरण र गाउँपालिका अध्यक्षसँग ज्येष्ठ नागरिक कार्यक्रम गरिएको बताए । यस प्रकारको कार्यक्रमलाई निरन्तरता दिइने उनले बताए ।